foto: Octavio Gómez

Unus lo tenian pensau y a otrus les entró el jormigueu en el cuerpu despuel de vel a la genti salil revestía a la plaza. Al final juerun muchus los que vinun, tantus que no cabian en el Rollu pal retratu. Según idi Eduardu ogañu lo primeru que se quería mas que ná era que lo´hombris y loh muchachus nuevus se revistieran. Se pue idil que to salió bien, y que pa otru añu se apercibi que pue salil mejol si la jenti se prepara los trajis con mas tiempu.

A mi me cojio juera, tenia el sombreru y la blusa prepará pal acontecimientu  peru no pu sel y me queé con las ganinas de habel veniu dejechamenti,

Carlu Migajón ehtaba comu enfaau porque no habian sacau el articulu que habia jechu pal periodicu de Extremadura, a mi me paici que no pasa ni tampocu na, porque en esus sitius logu lo lein solamenti la genti del pueblu y tampocu son tantus los serraillanus que se gastan la perras pa compral el periodicu. Yo creu que lo mas importanti de to es que lo puean vel los serraillanus,  sobre to, loh que se juerun comu idi la Pili en el pregón “unus pa siempri, otrus pa volvel en las fiestas” , a vel si se animan a venilsi una semana antis y de pasu gahtalsi alguna perrina mas en el pueblu que buena falta mos jadi a tos.

Lo mah importanti de to es que los serraillanus tenemus muchas cosas igualis y apaicias a lo ehtremeñus y tambien algunas particularis que nos jadin sel comu mas autenticus  y diferentis a lol demas, bonitas o feas TOITAS ESTAS COSINAS son lah mas importantis, son lah que tenemus que conserval y sacal a reludil toitu lo que poamus

Porque sino lo mihmu da il a Serradilla que a al pueblu de al lau, son toitus igualis, bonitas o feas TOITAS ESTAS COSINAS son las que apercibin los que vienin de juera porque nunca las han vistu antis en otru lau.

Solu nos acordamos del Cristu,, la Garganta,  el Monfragui … Tenemus que sacal a reludil y cuidal de que no se echin a perdel peru tamien las fiestas, las costumbris, las comias y los trajis tipicus o el lenguaji lo tienin que lleval aentru y enseñalsi a los muchachus pa que no se pierda

Subamus tos al sobrau a rebuscal en los arconis del tiempu y entresaquemus toas estas cosinas que acabu de idil estoy seguru que mas de unu se lleva una sorpresa cuandu las vea.

¿Cual es tu opinión sobre este día?

Comentarios (1)

RSS alimentador

...
escrito por capitan trueno, 03,octubre, 2008

Me hubiera gustau pa vel´lus, peru no pu´sel, anqui juera solu pa guisupeal. Yo no tengu ni en el sobrau ni en ningún arquetón arropijus del tiempu, peru amus que ni caiendu achamba me hubiera revestiu, menus ajuncus debin entral. Lo buenu de revestilsi asina, es que anqui ten´lujis no se ve

• 
• +5
• 
•